كان ماشي بعيد، حيران، هربان من كل حاجة وكل شيء، تعبان، وقرفان، مش عايز يشوف بني آدم واحد، أصلهم كلهم زي بعضهم واحد، لكنه قابله!
قابله في آخر مكان كان ممكن يتخيل إنهم يتقابلوا فيه! صدفة غريبة، لكنها كانت أحلى صدفة في حياته،
كان تعبان، آه، وشايل علي راسه أحلام كانت تكفي من الحبايب ألف، بس يا خسارة بقت أحزان، أوهام...
كان تعبان، آه، وشايل علي راسه أحلام كانت تكفي من الحبايب ألف، بس يا خسارة بقت أحزان، أوهام...
بقاله أيام نفسه يصرخ، يعيط، يزعق بكل قوته، يصرخ ويصرخ ويفضل يصرخ لغاية ما العالم كله يسمعه، يطبب عليه،
يمسح الدمعة المحبوسة جوا عينيه، ينور الضلمة اللي بقى عايش فيها ليل ونهار...
يمسح الدمعة المحبوسة جوا عينيه، ينور الضلمة اللي بقى عايش فيها ليل ونهار...
لسا فاكر لما شافه، ضحك له، كأن الدنيا ضحكته، نسي كل شيء، حكاله، شكاله، وقاله، كإنه وهو بيقوله كان في بير غويط، غويط قوي، وكل ما يحكي يطلع، وكل ما يشكي يشوف نور الشمس بيقرب، حتى ولو من بعيد! ولما خلص حكايته سمع له، وعرف ساعتها إنه بيبدأ من جديد!
لسا فاكر لما قال له الضلمة عمرها ما تطرد ضلمة، النور بس يطرد الضلمة، نوّر قلبك تشوف النور حواليك، فتح عينيك...
حتى لو البحر كسر مجاديفك في أول رحلتك، بص قدامك، باقي لك بقية النهار!
كفاية انتظار!
صحيح ممكن نقع في بداية الطريق، لكن لو استسلمنا هيفضل وشنا دايما في الطين ، ما تستسلمش! عافر مع الدنيا! ما تسيبهاش! روح لها ما تستناهاش!
بص عالشمس، خللي عينيك عليها، وارمي سهمك، أكيد مش هايجي فيها، بس هيوصل لمكان عمره ما كان ممكن يوصل له لو فضلت حاطط عينك علي رجليك، خايف تتزحلق... كل ما الدنيا تاخدك بعيد، ارجع تاني، ما تخافش! ولو خدت أحلامك بعيد، روح وراها، سايبها تروح علي فين؟!
اللي واجعك مش الجبل الفظيع اللي عايز تطلعه، لأ، دي حبة رملة صغيرة جوا جزمتك... شيلها، نضف جزمتك، واشتغل، جيب آخرك: إفحت نفسك قبل ما حد يردمك!
فيه ناس بتحلم وهي نايمة، وكل ما تحلم أكتر، تنام أكتر... وفيه ناس بتعيش بأحلامها، بتعيش عشان تحقق أحلامها... إصحى بدري، إلحق أحلامك!
عيش أحلامك، ما تسيبهاش، سايبها لمين؟! الحلم مش ممكن يموت لو نحلمه، لو تحلمه... أحلامنا الحقيقية هي اللي بتخلينا نفكر ونشتغل ونطحن نفسنا ونجرب ونعمل ونروح ونيجي، ولو ده ما حصلش، تبقى مجرد أماني، أوهام... أوعي تنام!
وما نيل المطالب بالتمني، ولكن تؤخذ الدنيا بإنك تحاول وتحاول وتحاول وتحاول وتحاول... وبعدين تحاول، ولما تزهق تحاول تاني، ولما تتعب تحاول تالت، ولما روحك تطلع تجرب من جديد، فترجع تحاول وتحاول وتحاول!
يا عم ده كلنا بنخاف، لكن تقدر تختار تكون شجاع... الشجاعة الحقيقية مش إن كل اللي بتخاف منه يختفي كإنه ما كانش، الشجاعة إنك تصدق قوي، قوي إن فيه حاجات أهم من إنك خايف وتعبان وقلقان، أحلامك أهم، حياتك أهم، إنت أهم!
امسح "ما أقدرش" من كشكولك، اكسر كل الشماعات، بص لفوق، لفوق قوي، واحلم، احلم كتير، ما تبطلش... وخليك دايما فاكر: وما نيل المطالب بالتمني، ولكن توخذ الدنيا... كدهه!
هناك 4 تعليقات:
ابداع يا حبيبي والله انتا دائما انسان عبقري بالرغم اني عندما ااري الطريقه العاميه بهذه الصوره لا انظر لها ولكن لاول مره احس ان لها جمال وزاد عليه جمالك وروحك السماويه ............ولا يسعني الا
ان ارتجل لك
اياته وحي اقلامه درر .....
فليت بعض من قليل في الارض اقلمه
وليت بعض من قليل في الارض احبره
ترقي مجد الاولين وسابق في عزه الدنيا والتاريخ ينتظر
فليتني اوفي بعض حقك انني
مقل بقولي والسان عواجز
اقبل مني هذا الارتجال بالرغم من سوءه
انا العقد الفريد محمد ياسر شاهين
أحسنت
اللي واجعك مش الجبل الكبير... بس حبة رمل صغيرة في جزمتك!!!
تحياتي من أرض الأحلام
الواحد بقاله كتير مقراش حاجة كده
جزاك الله عنا خيرا
اللي واجعك مش الجبل الفظيع اللي عايز تطلعه، لأ، دي حبة رملة صغيرة جوا جزمتك
إرسال تعليق